Nuer Field Project

Nouns Verbs Verb Book Expressions Pedagogical Grammar of Nuer Translation of Genesis in Nuer Others

Bible Translation

Cio̲o̲k 30

1 Mëë ci Rɛycɔl ɛ ŋa̲c ɛn ɤöö thilɛ gat mi
ci kɛn ɛ dieth kɛnɛ Jɛykɔp cuɛ nyiman nyir
ɛlo̲ŋ, kä cuɛ cɔwdɛ ni Jɛykɔp jiök, "Mi 'ci
ɤä bi moc gaat bä li̲w." 2 Cuɛ Jɛykɔp
lɔcdɛ waŋ kɛ Rɛycɔl, cuɛ jɛ jiök, "Ɣän cä
gua̲a̲ Kuɔth ɔ pen ji gatɔ guäl?" Kä cuɛ
Jɛykɔp jiök, "Ji̲n, käni nya la̲tdä ni Bi̲lä,
jak ni jɛ kä ciekdu, bɛ gua̲a̲ mua̲a̲likä dieth
ikä." 4 Cuɛ nya la̲tdɛ mɔ cɔal i Bi̲lä mɔ
ka̲m Jɛykɔp a la ciekdɛ, cu Jɛykɔp wä dueelɛ
kɛ jɛ. 5 Cu Bi̲lä ruët, cuɛ Jɛykɔp diëth
gat mi dho̲o̲l. 6 Cu Rɛycɔl wee, "Kuoth cɛ
ɤä luk, kä cɛ ruacdä liŋ a cɛ ɤä moc kɛ
gat." Kɛ kui̲c ɛmɔ cuɛ gat ɛmɔ cɔl i Dën.
7 Kä cu Bi̲lä in la nya la̲t Rɛycɔl rɔɔdɛ lɛ
ni nyɔk kɛ ruët, kä cuɛ lɛ ni dap kɛ gatdɛ.
8 Cu Rɛycɔl wee, "Ɣän cä kueer kɛ nyimaar
kɛ kueer mi di̲i̲t a cää puɔ̲t." Cuɛ gat ɛmɔ
coo cɔl i Nɛ̈p-tɔlaay.
9 Mëë ci Li̲i̲yä jɛ ŋa̲c i 'cɛ rɔɔdɛ bi lɛ
nyɔk kɛ dap, cuɛ nya la̲tdɛ mi cɔal i Dhilpä
ka̲m Jɛykɔp a la ciekdɛ.

(Page 110)

10 Kä cu nya la̲t Li̲i̲yä ni Dhilpä ruët, cuɛ
Jɛykɔp diëth gat mi dho̲o̲l. 11 Cu Li̲i̲yä
wee, "Kɛ baŋkä!" Cuɛ gat ɛmɔ coo cɔl i
Gɛ̈ɛ̈t. 12 Kä cu nya la̲t Li̲i̲yä ni Dhilpä
Jɛykɔp lɛ diëth rɛw gatädɛ mi dho̲o̲l. 13
Cu Li̲i̲yä wee, "Ɣän ci lɔcdä tɛɛth, kä bi
män diaal ɤä cɔl i mi caa poth!" Cuɛ gat ɛmɔ
cɔl i Acɛr.
14 Kɛ gu̲a̲a̲ la kɛn bɛlkiɛn a cɛc kɛ jɛ, cu
Rubɛn wä dɔɔr. Cuɛ dɛy jiaath mi cɔal i
mɛ̈ndarëëk pon, kä cuɛ kɛ nöŋ man ni Li̲i̲yä.
Cu Rɛycɔl Li̲i̲yä jiök, "Ŋɔali ɤä moc tha̲a̲ŋ
dɛɛni jiaath gatdu thinkɔn." 15 Cu Li̲i̲yä
wee, "Lɔɔcdu, ɛ ji̲n i ɛɛ mi tɔt ɛn käni min
ci kän ni cɔwdä a bi lɛ ben i bi ji̲n dɛy
jiaath gatdä lɛ ben ka̲n bä?" Cu Rɛycɔl
wee, "Ɣɔɔ, bɛ ku niɛɛn kɛ ji ɛn wääri kɛ
kui̲c dɛɛni jiaath gatdu tɔtɔ." 16 Mëë cɛ
luny jɔk dɔɔr kɛ thiaŋ cu Li̲i̲yä jɛ wä lor,
cuɛ wee, "Bër, nini kɛ ɤä kɛ ɤöö cä ji kɔk
kɛ dɛy jiaath gatdä." Cuɛ coo niɛɛn kɛ jɛ
ɛn wääri nɔmɔ.

(Page 111)

17 Kä u Kuoth ruac Li̲i̲yä liŋ, cuɛ ruët,
kä cuɛ Jɛykɔp diëth dhieec gan mi dho̲o̲l. 18
Cu Li̲i̲yä wee, "Ci Kuoth ɤä ka̲m lueel duŋädä
kɛ ɤöö cä nya la̲tdä ka̲m cɔwdä." Cuɛ ciötdɛ
coo cɔl i Ithakar. 19 Cu Li̲i̲yä rɔ nyɔk kɛ
ruët, cuɛ Jɛykɔp lɛ ni diëth bäkɛl gan mi
dho̲o̲l. 20 Cu Li̲i̲yä wee, "Kuoth cɛ ɤä ka̲m
nyin kuëndä a täämɛ bi cɔwdä ɤä ku yi̲k luɔ̲th
kɛ ɤöö cä jɛ diëth dho̲li dhɔɔli da̲ŋ bäkɛl."
Cuɛ gat ɛmɔ cɔl i Dhɛbulun. 21 Kɛ kɔrɛ cuɛ
lɛ dap kɛ nyal, cuɛ nyam ɛmɔ cɔl i Daynä.
22 Cu Kuoth Rɛycɔl lɛ tim, cuɛ ruac Rɛycɔl
liŋ, cuɛ lukdɛ lɛp. 23 Cuɛ ruët, kä cuɛ
dap kɛ gatdɛ mi dho̲o̲l, cuɛ wee, "Täämɛ Kuoth
cɛ pöcdä woc." 24 Cuɛ gat ɛmɔ cɔl i
Jothɛp cuɛ wee, "A Jaopa ku ɤä ma̲t gat dɔdiɛn.
25 Kɛ kɔr gua̲th ëë caa Jothɛp dap ɛ Rɛycɔl
cu Jɛykɔp Lɛybɛn jiök, "Aa kua jiɛɛn kɛ ɤöö
göörä wä gɔɔla muunda. 26 Kämni ɤä mänkä
tëë cä lät kɛ kui̲cdiɛn a mäni gaatkä, a kua
wä kɛ ɤöö ji̲n ŋäci pek la̲t ëë cä lät kä ji."
27 Kä cu Lɛybɛn ɛ jiök,

(Page 112)

"Duŋ nho̲ki rietdä dëë lar i cä jɛ tueth ɛn
ɤöö Jaopa cɛ ɤä poth kɛ kui̲cdu. 28 Läri
ɤä ni pek in go̲o̲ri i baa kɔk ni ji, bä jɛ
ka̲m i." 29 Cu Jɛykɔp ɛ jiök, "Ji̲n pu̲ɔnydu,
ŋäci pek la̲t in ci ɤɔ̲ɔ̲ku jɛ dieeth ni ro kä
ɤä. 30 Mëëdan ëë ka̲n ni ben ji̲n ti̲i̲ kɛ
ŋɔak ti tɔt kä ro, kä mëë cä ben cukɛ ro rep
a ŋuan. Cu Jaopa ji poth gua̲thni diaal tɔ
cä rɔ riet thi̲n tɔ, kä ɤän bä gɔlä ku lɛ
rial ikä i nɛy bä?" 31 Kä cu Lɛybɛn Jɛykɔp
jiök, cuɛ wee, "Ɣän bä ji ka̲m ni ŋu?" Cu
Jɛykɔp ɛ jiök, "Thilɛ mi dɔ̲ŋ mi bi ji̲n ɛ ka̲m
ɤä, mi go̲o̲ri duɔ̲ɔ̲r kɛl mi bi ji̲n ɛ lät kä
ɤä aa bä detku lɛ ni la̲a̲k, kä bä kɛ yien.
32 Aa wa̲a̲ rɛy deetku diaal walɛ, bä rɔɔm ti
cuɔri diaal wä liny, kɛn rɔɔm ti kuac diaal,
kɛ dɛy rɔɔmni ti ca̲a̲r diaal, kɛ böwni ti
cuɔri diaal a mäni ti kuac diaal. Kuaa kɛn
ti cetkɛ tɔtɔ la ko̲kdä tɔ. 33 Bi thuɔ̲kdä
jɛ nyoth cäŋ kɛl mi bi aa bii, bi pek in
la̲tä ben nɛn. Mi wii biɛɛl kɔkiɛn nɛn ti
'ci aa biɛɛl ti cuɔri kɛnɛ ti kuacni kɛ ti
ca̲a̲r, bi ɛɛ coo ŋa̲c i kualkɛ kɛ."

(Page 113)

34 Cu Lɛybɛn wee, "Gɔaaɛ, a ku cet kɛ pek
ɔ ci larɔ."
35 Kä ni ɛɛn cäŋ ɛmɔ cu Lɛybɛn thääk deet
bowni ti riaali ka̲n kɛnɛ ti kuacni, mäni ŋut
bowni diaal ti cuɔri, kɛnɛ ti kuacni, a mäni
tin diaal tin te kɛ biɛɛl ti bo̲o̲r, kɛ dɛy
deet rɔɔmni diaal ti te kɛ biɛɛl ti ca̲a̲r,
cuɛ kɛ ka̲m gaatkɛ kɛ ɤöö bikɛ kɛ yiop. 36
Cuɛ kamdiɛn moc kɛ ja̲l ni̲ni da̲ŋ diɔ̲k kɛnɛɛ
Jɛykɔp. Cu Jɛykɔp duɔth deet Lɛybɛn lɔɔ
la̲a̲k.
37 Täämɛ cu Jɛykɔp to̲ŋ jiaath mi ɤɔ̲a̲a̲c mi
cɔal i pɔpular ka̲n kɛnɛ to̲ŋ jiaath mi cɔal i
almond, kɛ to̲ŋ jiaath mi cɔal i plain.
Cuɛ kɛ ja̲m kɛ ti riaali a ŋotkɛ ɤɔ̲ckɛ, la
tiatdiɛn mi bo̲r a jɔc kam ko̲mni ti ca̲a̲r. 38
Cuɛ to̲ŋ tin cɛ ja̲m ku aa tomɛ nhiam buni
deet gua̲a̲ ma̲thdiɛn, kɛ tuɔ̲t in laa tuɔ̲ɔ̲t
kɛ ro bikɛ ro tut nhaim to̲ŋni tɔtɔ. 39 Bi
det coo dieth ni ti riaali kɛ ti cuɔri kɛnɛ
ti kuɔcni. 40 Cu Jɛykɔp dɛy rɔɔmni a liny
go̲lä, kä bɛ nhiam buni deet riet kä nyin
Lɛybɛn, tin riaali kɛnɛ tin ca̲a̲r.

(Page 114)

Cuɛ buɔ̲n deetkɛ yiop go̲lä kä nyin Lɛybɛn.
41 Mɔ go̲o̲r det tin bumkiɛn ɤöö tuɔ̲t kɛ ro
mɔ, bi Jɛykɔp to̲ŋ yiath piny gua̲a̲ ma̲thdiɛn
nhiamdiɛn kɛ ɤöö bikɛ ro tut gua̲a̲ to̲ŋni. 42
Kä iyɔɔ mi kɛ det tin kɔ̲c ni kɛn 'cɛ kɛ a
läthɛ thi̲n. Kɛ kui̲c ɛmɔ bi tin kɔ̲a̲c kɔ̲a̲a̲c
cuaa nyin Lɛybɛn , kä bi buɔ̲m buɔ̲ɔ̲m cuaa nyin
Jɛykɔp. 43 Cu wut ɛmɔ coo ria̲ŋ ni nɔ. Cuɛ
te kɛ buɔ̲n deet mi di̲i̲t, kɛ nyier la̲t, kɛnɛ
wutni la̲t, kɛ thɔ̲a̲rɔ̲a̲a̲li, kɛɛ muɔ̲li.

Nuer Field Project Nouns Verbs Verb Book Expressions Grammar Genesis Others